A Coruña acolle un importante festival da animación dixital
xoves, 9 de xullo do 2009
Este mércores comezou
na Coruña o VIII Festival Internacional de Animación, Efectos Especiais,
Videoxogos e Arquitectura Dixital Mundos Digitales,
que xunta a profesionais de todo o mundo neste encontro xa consolidado no que
tomar o pulso ao sector e poder escoitar de primeira man detalles sobre os
últimos traballos e tecnoloxías.
Os asistentes ao evento que acolle a sede coruñesa da Fundación Caixa Galicia puideron
ver onte a recreación
da praza de San Pedro elaborada por Double Negative para a película Ángeles y Demonios ante a
prohibición do Vaticano de tomar imaxes deste enclave, polo que tiveron que
empregar certas argucias para solucionar o problema, de xeito que tomar máis de
250.000 fotografías do contorno para construír un modelo tridimensional.
Ziah Foguel, de Double Negative, tamén comentou que a súa compañía optou por
desenvolver un novo software houdini
para encher o espazo tridimensional creado de xente para darlle unha aparencia
máis realista e, a pesares das avanzadas técnicas empregadas, precisaron de
entre 2 e 3 semanas para gravar cada unha das tomas principais.
Manuel Meijide, director do
Festival, asegurou que o certame presentará material en primicia,
contará coa proxección da edición asiática de Electronic Theater, terá lugar a primeira edición Cgarchitect Filme
Festival e incluso trasladaranse ata a Domus coruñesa para ver fragmentos en 3D
da nova produción de Dygra, Holy Night.
