A Deputación de Lugo renova a aposta polo Centro de Innovación e Transferencia

O pasado venres 24 de outubro a vicepresidenta segunda da Deputación de Lugo, Lara Méndez, visitaba as instalacións do Centro de Innovación e Transferencia de Tecnoloxía (CITT) co gallo de anunciar a renovación do convenio de colaboración entre ambas entidades. Cómpre dicir que o organismo provincial colabora con este centro da Universidade de Santiago na dinamización do sector da innovación tecnolóxica, a investigación e a difusión de coñecementos no medio económico e social cunha achega de 9.500 euros.
Ao acto tamén acudiron o vicerreitor de Coordinación do Campus de Lugo, Javier Bueno; o vicerreitor de Desenvolvemento Científico e Tecnolóxico do Campus, Andrés Barreiro; o vicepresidente de Caixa Rural, Luciano Sánchez; e o Secretario Xeral da CEL, Jaime López.
Dende o acto salientouse que a institución luguesa contribúe “a favorecer a interrelación entre as actividades universitarias e as necesidades empresariais”, posto que se enmarca -segundo Méndez- “dentro da aposta pola educación pública de calidade, pola investigación, o desenvolvemento e a innovación”. E engadiu: “En épocas de crise non podemos permitir recortes nestas materias, fundamentais para o progreso do país, para crear e impulsar a economía”.
É preciso lembrar que a Deputación leva preto de 30 anos traballando coa USC e case 20 co CITT. Este convenio vense renovando de xeito anual dende 1995, cando foi concretada a construción do CITT co obxectivo de establecer un servizo que relacionara as demandas específicas en materia de investigación en xeral, e da investigación aplicada en particular no marco do Campus lugués.