A Nintendo DSi chegará a España o 3 de abril

Nintendo anunciou que o vindeiro 3 de abril lanzará a súa nova consola portátil Nintendo DSi no mercado europeo e dúas cores (branco e negro). Esta nova consola sería a máis lixeira e delgada da familia Nintendo DS (é un 12% máis fina que a Nintendo DS Lite), e incorpora novas funcións grazas á incorporación de cámara e de lector de tarxetas SD, aínda que para poder engadir estas melloras foi preciso prescindir do porto de Game Boy Advance, o que racha a retrocompatibilidade con moitos xogos clásicos e incluso imposibilita o uso do accesorio preciso para xogar ao Guitar Hero On Tour.
A Nintendo DSi tamén aposta de xeito decidido pola conectividade, de xeito que fai moi doado compartir as fotografías que tomemos cos nosos amigos, inclúe navegador web de serie e mesmo abre a porta á compra de xogos en descarga a través da tenda Nintendo DSiWare.
Outra das melloras da consola estaría no apartado sonoro, que non só gañou en calidade, senón que tamén permite a reprodución musical; e tamén cómpre destacar que pese a que a consola sexa máis delgada e lixeira, o tamaño das súas pantallas é maior, pasando de 3 a 3,25 polgadas, á vez que tamén gozan de máis brillo segundo o fabricante nipón. Aínda que na nota de prensa de Nintendo non se menciona expresamente o prezo que terá a nova consola en España, estímase que custará uns 170 euros, custando un pouco máis que o modelo actual como tamén pasou no Xapón.

A Nintendo DSi venderase tanto en branco coma en negro