Os smartphones da marca Nokia desaparecen do catálogo de HMD

En 2017 a compañía que se fixo coa marca Nokia, HMD Global Oy, quixo aproveitar o selo finlandés para comercializar smartphones que ofrecesen ceta confianza aos consumidores, e durante os seguintes anos combinaron o lanzamento de teléfonos nesta liña revisións dos clásicos teléfonos básicos de Nokia, que en moitos casos limitaban a súa actualización a incorporar conectividade 4G.
Pero non semella que a longo prazo a marca Nokia conseguise facerse un oco no mercado dos smartphones, polo que na pasada edición do Mobile World Congress de Barcelona daban a entender que ía apostar por HMD como marca, constatándose no seu uso en dispositivos como o HMD Barbie Phone ou empregando o seu logotipo no patrocinio do FC Barcelona, chegando até o punto actual no que na súa páxina web para España no apartado de smartphones xa non aparece ningún modelo da marca Nokia, pese a que lanzaron varios modelos o ano pasado (como o Nokia G22 e o Nokia G42 5G).
Agora mesmo os únicos smartphones que ofrece directamente HMD son os móbiles de gama baixa HMD Pulse, Pulse+ e Pulse Pro, o seu novo HMD Fusion, e os seus móbiles insignia HMD Skyline e HMD XR21, sen contar con ningún móbil de gama alta no seu catálogo. Pola contra, como teléfonos clásicos son ten un da marca HMD (o HMD Barbie Phone), mentres que o resto continúan a utilizar a marca Nokia, dando a entender que continuarán a aproveitar a marca así polo recoñecemento que ten en certos mercados.