A PS Vita podería saír á venda a finais de outubro

Cando Sony anunciou a PS Vita, videoconsola portátil que tomaría o relevo da PSP, deu a entender que este ano chegaría ás tendas niponas, podendo demorarse a súa chegada a outros territorios, pero os últimos rumores apuntan a que podería chegar a tempo para o Nadal, o que poría as cousas moi complicadas á Nintendo 3DS, que xa non quedaría como a única portátil nova no momento de maiores vendas do ano.
Sony non confirmou ningunha das informacións que circulan pola Rede, pero un anuncio da cadea Blockbusters no Reino Unido marca o lanzamento da PS Vita no 28 de outubro a prezos de 229,99 libras esterlinas (o modelo básico) e a 279,99 libras (o modelo con conectividade 3G). Esta información podería querer dicir que a nova consola estrearíase de xeito global, sendo de agardar que en setembro teñamos máis detalles sobre a comercialización da mesma durante o Tokyo Game Show.