A PS3 prepárase para as 3D

Dende Sony anuncian a chegada do firmware 3.30 para a súa consola PlayStation 3, actualización que mellora o sistema de Trofeos, permite ordenar os trofeos de xeito ascendente e descendente segundo distintos criterios que buscan, entre outras cousas, facer máis doado a comparación dos trofeos acadados cos doutros xogadores.
Tamén preparouse á PlayStation 3 para novas características coma os xogos estereoscópicos (3D), chegando a tempo para o lanzamento dos novos televisores Sony BRAVIA que permitirán a visualización de contidos en 3D mediante lentes polarizadas.
Nos últimos días incidiron moito en que inicialmente a PlayStation 3 só vai poder tirar proveito da tecnoloxía 3D para os videoxogos, de xeito que a actualización que permitirá gozar de películas estereoscópicas en Blu-ray sairá máis adiante. Nesta mesma liña Sony Pictures tamén anunciou o lanzamento do primeiro Blu-ray 3D en España, que será a película Lluvia de Albóndigas, dispoñible en Blu-ray dende o pasado 30 de marzo, pero que a finais de xuño chegará nunha versión Blu-ray 3D. A esta película seguiranlle varios títulos nos vindeiros meses, principalmente de animación tridimensional, de aí que os interesados en estar á última deberán estar pendentes destes lanzamentos para non picar cun Blu-ray en 2D a só unhas semanas da súa versión 3D.

Así será a edición xermana de Lluvia de Albóndigas en Blu-ray 3D