A PSP estreará tenda de descarga de xogos

O vindeiro día 15 os xaponeses poderán comezar a mercar xogos para a PSP coma descargas directas dende a consola portátil de Sony, chegando o servizo posteriormente a Europa e EE.UU. (sen concretar datas, pero que podería ser antes de rematar o ano), anunciándose que todos os xogos que se lanzarán en formato físico (discos UMD) tamén se poderán mercar como descarga.
Os primeiros títulos en aproveitar o lanzamento polas dúas canles serían Bleach Soul Carnival (que sairía o 23 de outubro), Secret Agent Clank e Patapon 2: DonChaka (en novembro) e LocoRoco 2 (en decembro).
Ademais, Sony tamén anunciou que o xogo Resistance: Retribution será o primeiro en tirar proveito dunha funcionalidade do novo modelo da PSP (que finalmente se chamara PSP Plus) consistente en permitir o uso do mando Dual Shock da PlayStation 3 (incluíndo os dous controis analóxicos e a vibración), para o que tamén sería preciso contar cunha copia de Resistance 2 para PS3.