A PlayStation 4 soportará ultra alta definición

A PS3 contribuíu á adopción da alta definición no fogar

Nos últimos anos puidemos ver como os televisores foron uns dispositivos que, sen mudar esencialmente o seu funcionamento, deron saltos de xigante a nivel tecnolóxico, pasando de televisores de tubo a televisores planos en formato panorámico e, finalmente adoptando a alta definición, tecnoloxía para a que xogaron un papel decisivo as consolas de videoxogos (que na meirande parte dos fogares trouxeron a HD antes que o sinal televisivo) e os fabricantes queren continuar na mesma liña e, aínda que a alta definición non está todo o espallada que sería desexable, xa están a pensar no seguinte paso, a ultra alta definición ou 4K, o que parece algo totalmente innecesario nos formatos de televisor máis cativos, pero que agradecerán as grandes pantallas.
De feito, xa están a chegar televisores UHD ou 4K ás tendas, pero teñen a máis eiva que os televisores HD no seu lanzamento: a falta de contidos. E compañías como Sony parece que van repetir fórmula, e chegan informacións que apuntan a que Sony vai pór á venda un televisor LED de 80 polgadas con resolución 4K e, aínda que xa ten reprodutores de Blu-ray con soporte de 4K, aseguran que a futura PlayStation 4 tamén aceptará tal formato. Deste xeito, as películas e os videoxogos volverían a ser un incentivo para dar o salto á nova definición que é de agardar que teña unha adopción doméstica moito máis lenta do que os fabricantes desexan.