A USC e Caixanova mostran a historia da informática cunha exposición itinerante

Co pretexto de amosarlle ao público, de xeito didáctico e divulgativo, a evolución que experimentaron os sistemas de cálculo dende as culturas antigas ata o nacemento da informática moderna, a Universidade de Santiago de Compostela en colaboración con Caixanova, vai inaugurar, mañá xoves día 6 de novembro, a mostra didáctica itinerante Dos ábacos aos computadores, que se poderá visitar ata o vindeiro 14 de decembro nas instalacións da Facultade de Informática da Universidade da Coruña.
Dos ábacos aos computadores é unha mostra de carácter didáctico que pretende achegar ao visitante ó proceso evolutivo que experimentou a informática dende os sistemas de cálculo das culturas orientais, grecorromanas e islámicas e o progreso no cálculo matemático na Idade Moderna, ata a aparición, no século XX, da informática moderna.
Os últimos sesenta anos, e especialmente os últimos trinta, representaron a incorporación da informática como motivo de ocio e de cálculo, así como, de xeito particular, o seu emprego na resolución dos grandes problemas da investigación moderna.
Dado que o cálculo non foi sempre igual ao longo da historia, esta exposición presenta, diacrónicamente, o proceso do cálculo na sociedade ata a chegada da informática e fai fincapé na instrumentación actual para tentar mostrar “cómo pode ser o futuro”.
Polo tanto, a exposición iníciase cunha introducción aos métodos de cálculo da Humanidade, dende os ábacos da cultura oriental ata o cálculo na cultura islámica, pasando polas aportacións da cultura greco-romana. A continuación, un paseo pola matemática moderna, levará ao espectador a coñecer as primeiras calculadoras da historia, o cal lle permitirá comprender cómo o progreso no cálculo matemático desembocou no deseño das primeiras máquinas.
Xa nunca terceira parte, o visitante adentrarase no século XX, o propiamente dito da informática.