A Wii U podería adiar o seu lanzamento europeo a decembro

Aínda que as datas de lanzamento da Wii U continúan a ser toda unha incógnita, parece que xurdiron problemas na súa fabricación, de xeito que en Europa non poderiamos ver a nova consola doméstica de Nintendo antes do mes de decembro, pero a compañía está a esforzarse para conseguir pola á venda nos EE.UU. antes do Día de Acción de Grazas (o 22 de novembro) dado que o día seguinte é un dos días de maior consumo do ano, por ser unha xornada con moitas ofertas para celebrar o comezo da campaña de Nadal.
O analista de IHS Screen Digest, Piers-Harding Rolls, estima que Nintendo podería vender 4 millóns de Wii U antes de rematar o ano fiscal (no mes de marzo), algo no que influirá seriamente o prezo e a data do lanzamento da consola, aínda que tamén asegura que a Wii U non vai ser capaz de replicar o éxito da primeira Wii, por ter un público máis determinado e unha maior competencia (pois agora existen moitos outros dispositivos conectados como solución para o lecer electrónico).