A Wii é a consola doméstica preferida polo público feminino

Nos últimos anos o público feminino está a medrar de xeito importante no sector dos videoxogos, de xeito que pasarían dunha presenza case inexistente a ocupar o 29% do mercado, en boa medida grazas a que os desenvolvedores de xogos tiveron en conta ás mulleres e nenas á hora de deseñar os seus lanzamentos.
Pero de entre todas as compañías, parece que a que o está a facer mellor é Nintendo, pois segundo datos publicados polo seu presidente para EE.UU., o 80% das mulleres que fan uso dunha consola de videoxogos doméstica decántanse pola Wii, mentres que só o 11% usarían a Xbox 360 e o 9% a PlayStation 3.
Estamos a falar do público norteamericano, pero no resto do mundo a tendencia é bastante semellante, e non estaría limitada só ás consolas domésticas, senón que nas portátiles tamén está a arrasar a Nintendo DS, como quedaba claro nos seus redeseños e na súa oferta en distintas cores, mentres que a PSP de Sony é percibida como unha consola só para mozos.