A Xbox 360 contará con novos packs en Europa

As consolas de Microsoft empaquetaranse con xogos de balde

Como xa comentamos, Microsoft non se conforma con rebaixar o prezo das súas consolas Xbox 360, senón que tamén venderá as súas consolas incluíndo xogos de balde coas mesmas, e hoxe mesmo chegarán ao mercado Europeo os packs correspondentes.
Por unha banda a Xbox 360 Arcade incluirá de balde o xogo Sega Superstar Tennis polo seu prezo habitual de 179 euros, mentres que a Xbox 360 con disco duro de 60 Gb e a Xbox 360 Elite con 120 Gb de disco duro incluirán os xogos LEGO Indiana Jones e Kung Fu Panda por 239 e 299 euros respectivamente.
Pero a cousa non remata aí, e de cara á tempada de Nadal irán aparecendo novos packs con xogos, que se corresponderían ao modelo con 60 Gb de disco duro, e que incrementarían o seu prezo 30 euros. Así, a partir do 7 de novembro se podería mercar a consola co xogo Gears of War 2 ou co novo título de James Bond (Quantum of Solace) por 269 euros, mentres que o 21 de novembro sería o Tomb Raider: Underworld o que se ofertaría (incluíndo adicionalmente unha tarxeta con 1.200 Microsoft Points). Para rematar, o 12 de decembro sería o novo Prince of Persia o que estrearía pack.