A galega LambdaStream, seleccionada polo Foro Neotec para abrirse camiño no eido internacional

A empresa galega LambdaStream, desenvolvida no marco do Viveiro de Empresas da Universidade da Coruña por Víctor Manuel Gulías e Miguel Barreiro, vén de recibir un importante pulo na súa carreira pola excelencia no sector das novas tecnoloxías, logo de ser seleccionada como unha das dezaseis mellores empresas start-up de toda España no quinto Foro Neotec. Este evento, promovido polo Centro para o Desenvolvemento Tecnolóxico e Industrial (CDTI) do Ministerio de Industria contará coa presenza doutra empresa galega, mais ata o de agora Código Cero non puído coñecer de cal se trata.
A quinta convocatoria do Foro Neotec celebrarase en Valencia o día 7 de novembro, e terá como obxectivo promover a innovación e o desenvolvemento tecnolóxico das empresas do Estado a través da aposta directa por proxectos competitivos.
Entre as medidas que leva a cabo o Centro está a de poñer a disposición das empresas un tecido de oficinas no exterior, co fin de servir de axuda nas súas actividades fóra de España. LambdaStream foi creada en 2003 como unha spin off da Universidade (UDC) e conta actualmente con dez empregados.
A empresa, segundo informa a UDC, está a desenvolver importantes proxectos no eido da televisión interactiva e por teléfono móbil, incluíndose no seu paquete de actividades o proxecto VoDKA (Video on Deman Kernel Architecture), que achega solucións innovadoras para a televisión dixital.