A informática social, a debate este martes na Facultade de Historia de Santiago

A Fundación Centro de Estudos Eurorrexionais Galicia-Norte de Portugal celebra este martes, día 11, na Facultade de Historia de Santiago a xornada Informática Social e Desenvolvemento Urbano-Rexional, co patrocinio da Dirección Xeral de Promoción Industrial.
Segundo informa a USC, a xuntanza contará coa participación de dez grupos de investigación pertencentes ás seis universidades públicas galegas e do norte de Portugal e Irlanda, técnicos e profesores todos eles de recoñecido prestixio internacional. O programa inclúe dous relatorios e dez exposicións sobre as actividades de investigación que se levan a cabo na actualidade no eido da Sociedade da Información, as novas tecnoloxías e o desenvolvemento urbano rexional.
As sesións abriranse ás 9:30 horas nun acto ao que lle seguirá a conferencia do profesor Patrick O´Flanagan, do University College Cork de Irlanda, sobre a sociedade da información e a investigación no sistema universitario irlandés.