A primeira edición de Faro Gaming converterá Vigo en centro de operacións gamer
mércores, 12 de xuño do 2019
Avanza
a presenza do lecer dixital (videoxogos, eSports, competicións
en liña, etc) entre a nosa mocidade, e, de xeito paralelo,
increméntanse as oportunidades para que a comunidade de seareiros
intercambie coñecementos e interactúe. Entre estas “oportunidades”
atópase a primeira edición de Faro
Gaming, un evento que está a chamado a ser o espazo común
galego para todas e todos os amantes dos videoxogos. O evento
celebrarase da man do Faro de Vigo, entre os días 14 e 16 de xuño.
O lugar elixido é o Auditorio Mar de Vigo e o obxectivo “construír
o futuro dos deportes electrónicos na cidade”. Colaboran
a UVigo, R e mailo proxecto Faneka Gaming.
Todas
as entidades participantes xuntaron forzas cun reto común: poñer
Vigo no espazo central da actividade gaming e darlle á
comunidade local e galega (unha comunidade moi puxante) o espazo de
encontro que se merece. Ao mesmo tempo, tentarase reflectir e
reivindicar o máis que relevante potencial da nosa industria dos
videoxogos, segundo lembra Bruno Rodríguez, organizador do evento e
director de sistemas no Faro de Vigo.
O
auditorio Mar de Vigo transformarase durante a vindeira fin de semana
“nun gran espazo adicado ao universo gamer”. Haberá
ordenadores, consolas, realidade virtual, obradoiros, mesas redondas,
charlas e ata un campo de fútbol. Será, en palabras da
organización, “un festival ateigado de atractivos para todo tipo
de xogadores e xogadoras, dende principiantes ata os máis expertos”.
No
centro de atención situaranse os deportes en liña: haberá torneos
afeccionados de League of Legends, FIFA, Clash Royale e Brawl
Stars.
Amais,
o Faro Gaming achegará diversas experiencias do mundo dos videoxogos
e da tecnoloxía, a través de varios módulos de programación. Nun
deles, dedicado aos videoxogos independentes, a organización traerá
en exclusiva a diferentes estudos de videoxogos, de Galicia e España,
para que o público poida coñecelos de primeira man e probar as súas
novas creacións antes de que saian ao mercado.
Noutro,
un punto de showmatch, as e os participantes coñecerán e
xogarán cos seus creadores de contido favoritos aos videoxogos
competitivos máis importantes do momento. Ademais, Faro Gaming
contará tamén con distintos recantos de lecer nos que se ofertarán
distintas experiencias: unha zona retro, probas de realidade
virtual, un espazo con simuladores de carreiras de última xeración
para os apaixonados do motor, e ata un campo de fútbol, de céspede
artificial, onde os seareiros poderán xogar de forma libre ao FIFA.