A semana que vén teremos unha nova edición de DataBeers Galiza

O Centro de Excelencia en Intelixencia de Negocio (CEIN) celebra o vindeiro 29 de xuño o DataBeers Galiza, un evento de networking que se nesta terceira edición desenvolverase na Sala Eisenman da Cidade da Cultura a partires das 19:30 horas. A asistencia é de balde, pero ante as limitacións de aforamento será preciso inscribirse en liña para poder acudir.
DataBeers Galiza procura aumentar a alfabetización no mundo dos datos dunha forma accesible e amable, Os eventos DataBeers teñen ademais un elemento secundario, a cervexa, que actúa como nexo facilitador da interacción entre todos os asistentes. O público xoga un papel importante, xa que pode participar e compartir impresións durante as charlas, creándose unha comunidade activa en torno ao mundo dos datos.
Nesta ocasión abrirá o evento Andrés García-Rodeja, director do CEIN e recente gañador do Premio Traxectoria Profesional do Colexio Profesional de Enxeñería Informática de Galicia cun relatorio que leva por título Hai algún Data Scientist na sala?. Celia López, responsable de produto en proxectos de intelixencia de negocio, e Fernando Branco, responsable de desenvolvemento de front-end e visualización avanzada de información en DXC Technology, falarán sobre O Shu, o Ha e o Ri.
A continuación David Losada, profesor titular de universidade e Investigador senior asociado ao CiTIUS, exporá os seus traballos sobre Minería de Textos para a Detección Temperá de Riscos: o Caso da Depresión, e por último, Elias Castro González, xefe de proxectos Business Intelligence na área de Analytics para Sanidade de DXC Technology, pechará a edición de DataBeers Galiza co relatorio Datos que salvan vidas. O medicamento do futuro.