A sucesora da Xbox podería interactuar cos receptores de televisión de pagamento

Os rumores apuntan a que o mes que vén Microsoft presentará a consola de videoxogos que sucederá á Xbox 360, e dende o blog tecnolóxico The Verge adiantan en exclusiva que a nova consola vai apostar con decisión por converterse no corazón multimedia do salón doméstico, chegando incluso a casar coas transmisións de televisión incorporándolles elementos ricos na liña de Google TV. Deste xeito, os usuarios de servizos de televisión de pagamento poden conectar o seu receptor coa nova Xbox a través de HDMI, permitindo que a consola incorpore á imaxe información sobreimpresa, o que abrirá a porta a múltiples funcionalidades que chegará a través de alianzas de Microsoft con provedores de contidos.
Entre as bondades de combinar a televisión coa Xbox estaría o feito de que a nova consola contará cun sensor Kinect de nova xeración, que podería detectar á xente que está a ver a televisión e incluso facilitaría funcións como a de pausar os contidos cando os espectadores miren para outro lado (na liña do que xa fai o Samsung GALAXY S 4 no móbil).
Aínda que estas novas funcionalidades cheguen inicialmente a través dunha consola de videoxogos de nova xeración, non desbotan a posibilidade de que no futuro cheguen nunha especie de Xbox de baixo custo, que estaría centrada na televisión (que hoxe xa é un uso moi habitual para as consolas de videoxogos nos EE.UU., onde están dispoñibles plataformas como Netflix).