A tecnoloxía Dolby Volume comeza a implantarse

O ano pasado en varias feiras tecnolóxicas se falou da tecnoloxía Dolby Volume que incorporaría un Volume Leveler que ecualizaría os son altos e baixos tralo que un Volume Modeler axustaría os niveis de graves e agudos, de xeito que se podería facer que o volume dos sinais das canles de televisión non variase escandalosamente ao facer zapping ou mesmo coa chegada dos bloques de anuncios, o que agradecerán os oídos dos usuarios.
Esta tecnoloxía aínda non está xeralizada (aínda que se agarda que no futuro se inclúa de serie en moitos televisores) e na feira IFA se puideron ver receptores coma o AVR 7550HD de Harman Kardon ou o FMJ AVR600 de Arcam, que serían os primeiros dispositivos en incorporar Dolby Volume.
Facer que a reprodución de películas en DVD ou Blu-ray, así como escoitar emisións televisivas ou mesmo música sen percibir cambios bruscos no volume e mantendo os graves e agudos nuns valores que non resulten molestos é algo que poucos usuarios rexeitarían, e para facernos unha mellor idea do que ofrece esta tecnoloxía recomendamos ver a demostración que ofrecen dende a web de Dolby.