A vindeira semana constituiranse os Colexios Profesionais de Enxeñería en Informática

Os días 14 e 15 de decembro celebraranse no Auditorio de Galicia (Santiago de Compostela) as asembleas constituíntes do Colexio Profesional de Enxeñería Técnica en Informática (CPETIG) e do Colexio Profesional de Enxeñería en Informática (CPEIG) respectivamente, co que a Asociación de Enxeñeiros en Informática de Galicia (AIEG) ve cumprido o seu principal obxectivo dende a súa creación en 1992.
Con estes novos organismos Galicia converterase na décima comunidade autónoma con colexio profesional de Enxeñería en Informática e a sexta no caso da titulación técnica, atendendo ás leis de creación publicadas en decembro de 2006, atendidas por dúas comisións xestoras encargadas de realizar o traballo necesario para chegar ás próximas asembleas constituíntes.
Para a xunta de goberno do CPETIG só existe unha candidatura encabezada por Leticia Diz Bengoche, mentres que o CPEIG deberá celebrar eleccións para decidir entre as candidaturas presentadas por María José Durán Domíngez e Fernando Suárez Lorenzo.