ATEGAL lanza unha app de recursos e actividades para as persoas sénior de Galicia

As persoas sénior de Galicia contan dende este inicio de ano cun espazo dixital especialmente pensado para elas onde poderán consultar as actividades ocupacionais, culturais e de ocio, ademais doutros recursos útiles e de interese.
A Asociación Cultural Galega de Formación Permanente de Adultos (ATEGAL) vén de publicar a súa nova aplicación móbil, na que recolle as diferentes actividades e recursos que pon a disposición das persoas usuarias.
A ferramenta está dispoñible para iOS e Android, dende este 31 de decembro.
A través desta aplicación, que conta coa financiamento da Consellería de Política Social e Igualdade da Xunta de Galicia, as persoas maiores de 55 anos poderán consultar comodamente desde o móbil as actividades que ofrece ATEGAL. Poderán facelo filtrando os resultados por día, por cidade ou por área temática: cultural, ocupacional, saúde e ocio.
Esta ferramenta está dispoñible para as poboacións galegas onde a asociación ten sede: Vigo, A Coruña, Ferrol, Monterroso, Santiago, Padrón, Ourense e Lalín.
Xunto á descrición das actividades, tamén está dispoñible o contacto da entidade organizadora. “Deste xeito, non só se está a crear un calendario senón un repositorio que facilita a comunicación das persoas usuarias coa entidade, para a resolución de dúbidas e ampliación de informacións”, informan dende ATEGAL, engadindo que o seu obxectivo foi “crear un espazo de recollida de recursos asistenciais, informativos e de consulta que ten en conta as necesidades e intereses específicos das persoas maiores”.