Actividades abertas e cinema en 3D para a Semana da Ciencia dos museos da Coruña

Os museos científicos da Coruña atópanse neste intre en plena actividade de divulgación científica. De feito, e con motivo da Semana da Ciencia as súas portas ficarán abertas ao público en xeral (con entrada de balde) ata o 16 de novembro en horario de 10.00 a 19.00 horas. Por unha banda temos a achega da Domus (na imaxe), onde poderemos visitar a mostra Continentes Vivos e asistir (tamén) á proxección dun filme en tres dimensións (3D) e realizado a través de tecnoloxías dixitais: Dinosauros xigantes na Patagonia.
Polo que se refire ao Aquarium Finisterrae, a súa achega consiste tamén nunha mostra, só que neste caso relativa ás ciencias do mar e á súa aplicación no eido da saúde: Farmacéuticos: a botica do mar. Para participar nestas e outras actividades programadas (dirixidas para o público en xeral) de xeito colectivo, cómpre contactar cos museos para formalizar as reservas a través do teléfono 981 189 842.
Por certo que á devandita actividade programada na Domus cómpre engadir outras como por exemplo o obradoiro sobre científicas celebrado ao longo da mañá deste 12 de novembro no dito museo e dirixido a estudantes de primaria. O encontro cos nenos e nenas incluíu sesións de contacontos e representacións teatrais. O obxectivo: procurar a aproximación ás mulleres científicas que desenvolveron e desenvolven o seu traballo nun eido, o investigador, tristemente dominado ao longo da historia pola presenza masculina.