Amazfit Balance, un smartwatch completo e con boa autonomía

Amazfit ten un novo smartwatch no seu catálogo, que pese a funcionar cun sistema operativo de seu é bastante completo, de xeito que o Amazfit Balance tanto pode servir para facer un seguimento da nosa actividade física como serve para realizar chamadas a través de Bluetoooth e realizar pagamentos sen contacto mediante Zepp Pay.
O smartwatch Amazfit Balance véndese en dúas cores (midnight e sunset grey) a un prezo de 249,90 euros. Ten unha pantalla AMOLED de 1,5 polgadas; conta con funcións de adestrador persoal e 156 modos deportivos; monitoriza o ritmo cardíaco, o osíxeno en sangue o estrés e o sono; resistencia a auga até 5 atmosferas; GPS; Wi-Fi; Bluetooth 5.0; integra o asistente de voz Alexa; a súa batería de 475 mAh achega unha autonomía de até 14 días de uso típico; e só pesa 45 gramos.
Estamos ante un dispositivo moi interesante, que como principal atranco ten que o seu prezo, que o sitúa en competición directa con reloxos con wearOS, que ofrecen mellores prestacións no que aplicacións se refire, a prezos de mercado máis axustados. Tamén cómpre lembrar que Zepp Pay non funciona directamente con bancos españois, polo que de querer empregar este tipo de reloxos para pagar hai que empregar un servizo a maiores (Curve).