Anthropic parodia a introdución de publicidade en ChatGPT nun anuncio da Super Bowl

Anthropic marcou posición no debate sobre a monetización da intelixencia artificial cunha mensaxe clara: o seu asistente Claude non terá publicidade. A compañía defende que introducir anuncios nas conversacións sería incompatible coa natureza dun asistente pensado como «un espazo para pensar», especialmente cando moitas interaccións abordan cuestións sensibles, persoais ou de traballo complexo.
Anthropic argumenta que as conversas con asistentes de IA son radicalmente distintas das procuras en buscadores ou das redes sociais, onde os usuarios xa asumen a convivencia entre contido orgánico e patrocinado. No caso da IA conversacional, sinala a empresa, o formato aberto e o nivel de confianza que se establece fan que a presenza de anuncios resulte incongruente e, nalgúns casos, inapropiada. Ademais, advirte de que os incentivos publicitarios poderían interferir co obxectivo principal do asistente: actuar de maneira inequívoca no interese do usuario.
A compañía exemplifica este risco cun escenario sinxelo: se un usuario comenta problemas para durmir, un asistente sen incentivos comerciais exploraría posibles causas como o estrés ou os hábitos. Nun modelo con publicidade, en cambio, podería existir a tentación de orientar a conversa cara a unha oportunidade de compra. Mesmo se os anuncios non influísen directamente nas respostas, a súa simple presenza no contorno da conversa rompería, segundo Anthropic, a idea dun espazo limpo para a reflexión e o traballo.
Este posicionamento foi acompañado dunha campaña publicitaria pouco habitual: Anthropic lanzou varios anuncios, incluído un spot previsto para a Super Bowl (que se celebrará o vindeiro domingo), nos que se burla de asistentes de IA que introducen publicidade de forma intrusiva. A mensaxe implícita apunta a competidores que xa confirmaron plans para incorporar anuncios, polo menos nas versións gratuítas dos seus produtos.
A reacción non se fixo agardar. Sam Altman, director executivo de OpenAI, criticou publicamente a campaña, cualificándoa de enganosa. Segundo Altman, OpenAI nunca introduciría anuncios da maneira caricaturizada nos spots de Anthropic e subliñou que os plans de publicidade para ChatGPT serían claramente etiquetados e separados das respostas do modelo. Ademais, defendeu que o acceso gratuíto á IA é clave para democratizar a tecnoloxía, algo que, ao seu xuízo, Anthropic non prioriza ao centrarse nun produto de subscrición máis caro.