Arc Search mestura navegador, buscas e IA para revolucionar como nos relacionamos coa web

Aínda que nos últimos anos os navegadores web parecían ser cousa unicamente dos xigantes da Internet, hai compañías que ousan entrar neste complicado mercado, e estes días The Browser Company está a ofrecer o seu Arc Search para iPhone, que utiliza como grande reclamo o seu uso da IA, e que ten previsto chegar a Windows en primavera.
Este navegador web, baseado na mesma tecnoloxía que Chrome, pero empregando como buscador predeterminado Perplexity (motor de busca baseado nun grande modelo de linguaxe), co que buscan que os usuarios poidan chegar rapidamente ás respostas que buscan en vez de ter que andar a consultar numerosos resultados de busca antes de dar coa información que precisan.
Arc tamén conta con tecnoloxía de bloqueo de publicidade, pode realizar resumos de páxinas web para axilizar os resultados de busca, conta cun modo de lectura que procura reducir as distraccións e tamén arquiva de xeito automático as pestanas inactivas para conseguir unha mellor organización.
Dado que Arc non vende datos persoais dos seus usuarios e ofrécese de balde, non está nada claro cal será o seu modelo de negocio, pero pode que esteamos ante un de moitos navegadores web que nos vindeiros meses busquen facerse un oco grazas ás posibilidades que achega a IA ao noso xeito de relacionarnos cos contidos na Rede.