As consolas de videoxogos incitan á compra de televisores de alta definición

Un estudo elaborado por Frank N. Magid Associated amosa que o 18% dos televisores de alta definición adquiridos no último ano se mercaron grazas ás consolas Xbox 360 e PlayStation 3. Os usuarios das novas consolas son conscientes de que sen televisores axeitados non percibirán a mellora de calidade dos xogos, polo que se ven impulsados a modernizar os seus televisores para poder gozar axeitadamente dos últimos videoxogos.
Hai que ter en conta que na actualidade os contidos televisivos e en discos ópticos en alta definición son totalmente anecdóticos, mentres que os videoxogos para Xbox 360 e PS3 si aproveitan a resolución das novas pantallas, polo que se converten na porta de entrada natural da alta definición nos fogares.
Os datos do estudo corresponden aos EE.UU. onde estiman que o 25% dos fogares xa contan con algún televisor de alta definición (e xa é considerable o número de domicilios con máis dun televisor compatible con esta tecnoloxía).
En España a situación é bastante diferente, xa que as emisións televisivas en alta definición son case inexistentes (actualmente só utilizan tal tecnoloxía Canal+ HD e a canle de probas da TVC) polo que a relación de compradores que adquiren un televisor de nova xeración para aproveitalo coa súa consola de videoxogos aínda podería ser maior.