BlockGalicia xuntará na Coruña a centos de profesionais do sector da blockchain

Entre os días 13 e 14 de setembro PALEXCO acollerá a segunda edición do Congreso Intenacional de Blockchain de Galicia, BlockGalicia, que prevé congregar uns 800 asistentes, que poderán coñecer as últimas novidades da man de preto de 40 profesionais de empresas de blockchain de Europa e América Latina.
Por primeira vez reúnense en Galicia referentes do sector da tecnoloxía blockchain como Israel Serrano, Javier Kurman, Pablo López, José Iglesias, Javier Belarte, Stina Biltrefil, Jesús Lorente, María Cerviño, Carlos Callejo ou Víctor Muñoz, entre outros.
«O blockchain postúlase como a tecnoloxía que achega novas oportunidades que suporán un grande salto respecto ao internet que coñecemos e empregamos ata agora», sinala José Manuel Martínez, decano do COETTGA, «esta é unha ocasión única para coñecela de primeira man».
BlockGalicia conta co soporte de empresas líderes no sector das telecomunicacións e do blockchain como DEXTools, empresa con participación e orixe galega, que a nivel mundial é consultada e referencia no seu ámbito para máis de 20 millóns de persoas ao mes.
Ademais, o resto de referentes en integración de tecnoloxía blockchain, como BitBase, Material Bitcoin, Metlabs Blockchain, Tron, Polkadot, Fundación Luckia, Metis e BitLayer, Nomasystems ou Hijos de Rivera, entre outros, fan deste evento unha garantía de éxito e futuro, significando un respaldo e unha garantía para os asistentes e interesados.