Blusens está presente no salón Broadcast a través da súa participación no proxecto SATURNO

Esta semana o IFEMA (Madrid) acolle o Salón Profesional Internacional da Tecnoloxía Audiovisual, Broadcast It!, onde estará presente Blusens a través do expositor de Hispasat, grazas a que a compañía galega de electrónica de consumo está a colaborar no proxecto SATURNO, financiado polo Ministerio de Industria, Turismo e Comercio dentro do Plan Nacional de Investigación Científica, Desenvolvemento e Innovación Tecnolóxica 2008-2011 e o Fondo de Desenvolvemento Rexional FEDER.
O proxecto SATURNO (SATellite Universal tv Redistribution NetwOrk) busca desenvolver dispositivos e sistemas para o fogar dixital que permitan aproveitar ao máximo as capacidades de distribución de contidos e servizos multimedia das plataformas de difusión vías satélite actuais e futuras, así como facilitar o acceso a través de diferentes dispositivos multimedia existentes no fogar (de aí que Blusens achegarse ao proxecto o seu produto estrela, o web:tv).
A motivación principal do proxecto é a distribución eficaz dos novos servizos avanzados multimedia (alta definición, interactividade, Internet TV, vídeo baixo demanda, televisión en 3D...), desenvolvidos ao redor da tecnoloxía DVG-S2, que permite aumentar considerablemente a capacidade de transporte dos satélites existentes, así como a necesidade do sector de atopar sistemas de distribución innovadores que permitan aproveitar as mencionadas capacidades, maximizando as posibilidades e vantaxes para o usuarios final á vez que se reduce o custo do equipamento de recepción necesario.