Blusens incorpora o galego na súa liña de sintonizadores TDT

Blusens Global Corporation, a multinacional galega de electrónica, semella non estar no mesmo entorno que as demais compañías ás que a crise lles está a afectar gravemente nas súas vendas e segue a medrar pese á mala situación económica mundial que estamos a vivir, sen esquecer nunca, iso sí, de onde provén.
Agora, a nosa compañía TIC máis internacional, ademais de confirmar a boa marcha das vendas dos seus produtos de electrónica de consumo habituais como os reprodutores MP3 e MP4, os GPS, as pantallas TFT e incluso as minicomputadoras, vén de anunciar a distribución de máis de 100.000 unidades de sintonizadores de TDT ao mes para o resto do ano, unhas vendas que non inclúen os sintonizadores TDT integrados noutros produtos da firma como televisións ou discos duros multimedia.
A liña de sintonizadores TDT de Blusens comprende unha ampla gama que segundo afirman, “satisfán as necesidades de calquera usuario”, comezando polos modelos SCART, como o T.8 e o T.9, de reducidas dimensións, e continuando cos modelos T.11, T.12 e T.13, que “pasaron os controis máis esixentes de calidade de sinal”.
A firma galega decidiu apostar por este tipo de tecnoloxía con vistas a equipar á sociedade galega con TDT antes da inminente chegada do “apagón analóxico” do vindeiro ano 2010 e segundo indican, “fixeron un esforzo por crear menús sinxelos e de manexo doado para tódolos usuarios”, sen esquecer o galego como unha das línguas nas que poder configurar os sintonizadores TDT.
Os responsables desta liña de produtos propuxéronse como obxectivo proporcionar gran variedade de opcións en prezo e prestacións aos seus usuarios e afirman que, tras o apagón analóxico, os seus usuarios “non terán que preocuparse polo rendemento do seu novo sintonizador”.