Blusens presenta en Madrid o seu Catálogo de Produtos 2009

Blusens, a compañía tecnolóxica galega de lecer dixital que, ao igual que os cativos do colexio que asisten con ilusión aos primeiros días do curso acabado de estrear, comeza a súa andaina nunha nova tempada de novidades tecnolóxicas, vén de anunciar a presentación do seu último Catálogo de Produtos para o 2009.
O acto, que terá lugar o vindeiro 1 de outubro ás 20:30 horas no Hipódromo da Zarzuela en Madrid, servirá para que a firma galega dea a coñecer a súa nova liña de produtos, tanto portátiles como para o fogar que, ademais de cumprir coas expectativas que esixe o mercado, axústase ás tendencias creadas para o vindeiro ano.
Blusens apuntou que aproveitará o devandito acto de presentación para mostrar (por primeira vez en público) o funcionamento dos novos dispositivos como o inminente HED, a súa principal aposta para o fogar conectado que xa tivo unha gran acollida entre os medios de comunicación especializados.
Os responsables da compañía anunciarán, asemade, o nome oficial deste dispositivo no mesmo evento e presentarán en vivo aos primeiros artistas que van ser lanzados por Blusens Music, o selo musical virtual de Blusens.