Blusens prosegue a súa internacionalización cunha nova sede en Miami

Blusens, a firma santiaguesa de electrónica de consumo, vén de reafirmarse no seu papel de empresa tecnolóxica máis internacional de Galicia e, facendo caso omiso ás recomendacións de expandirse con tino ata que a crise mundial vaia cesando, vén de anunciar o seu desembarco en Estados Unidos, onde abrirá unha sede en Miami.
A empresa galega, que xa ten filiais en China, Dubai, Malasia, México, Uruguay, Reino Unido, Portugal e Canadá, vai contar con presenza en nove países máis grazas á apertura desta nova sede no país máis poderoso do mundo.
Segundo poidemos ler no xornal La voz de Galicia, o obxectivo desta entrada en Estados Unidos é “organizar toda a operativa e a loxística tanto en Norteamérica como en Sudamérica” e, en palabras de Miguel Churruca, o director de marketing e comunicación de Blusens, escolleuse Miami, “por ser un lugar de referencia para calquera compañía así como por ser un centro loxístico clave onde hai moitos provedores e firmas de distribución”.
A compañía tecnolóxica aínda non ten previsto entrar comercialmente en Estados Unidos, aínda que o devandito medio de comunicación asegura que “si é un obxectivo a medio e longo prazo”.
Os responsables de Blusens afirman que coa apertura desta sede en Miami, primeiro posicionaranse alí para a operativa e a distribución e logo, máis adiante, “para vender”.