Caixa Galicia investiu 12 millóns de euros en I+D+i en 2009

Caixa Galicia é unha das empresas galegas que máis inviste en investigación, desenvolvemento e innovación (I+D+i) cunha contribución de 12 millóns de euros no último exercicio. A caixa galega achega o 4,2% do gasto total en I+D realizado polas empresas privadas de Galicia en 2008 que ascendeu, segundo a información publicada polo Instituto Nacional de Estatística, a 280 millóns de euros.
Nos últimos tres anos a caixa galega investiu máis de 18 millóns de euros en I+D+i, dun total de 192 millóns investidos en tecnoloxía, co obxectivo de ser pioneiros en innovación tecnolóxica en Galicia. O director de Sistemas de Caixa Galicia, José Manuel Valiño Blanco, subliña que «o investimento en I+D+i é a única maneira de sermos competitivos no futuro».
Ao investimento puro en I+D+i, Caixa Galicia suma 54,1 millóns de euros en investimentos en tecnoloxía propia en 2009 (equipos, instalacións, redes, proxectos informáticos, etc.) para seguir contando cunha das plataformas tecnolóxicas máis desenvolvidas do sistema financeiro español e «satisfacer as novas necesidades dos nosos clientes», asegura José Manuel Valiño. Entre 2007 e 2009, a caixa galega investiu máis de 192 millóns de euros en tecnoloxía financeira.
A diferenza do resto de empresas que, segundo o INE, reduciron un 8,6% o investimento en I+D+i, a caixa galega aumentou un 340% o gasto en investigación, desenvolvemento e innovación logrando certificar en 2009 un total de 12 millóns de euros en investimentos tecnolóxicos en I+D+i que se realizaron en 2008.
Dende A Coruña, onde mantén a base do seu Centro de Procesos de Datos (CPD), Caixa Galicia controla toda a operativa das súas máis de 800 oficinas en España e as situadas no estranxeiro e desenvolve toda unha serie de produtos e servizos innovadores. A división de Sistemas da caixa galega conta cun cadro de persoal de 148 especialistas.
Entre os proxectos máis importantes de I+D+i levados a cabo pola entidade destacan a posta en marcha da plataforma bancaria Metrópolis, que permite o desenvolvemento de novas aplicacións que melloren o servizo ofrecido aos clientes, a plataforma avanzada de comunicacións Genesys que facilita a xestión dos contactos de forma máis rápida e efectiva, o proxecto 6-Sigma que permite o estudo detallado dos clientes ou a valixa electrónica enfocada á redución do uso de papel, entre outros.
Vicente García Lloréns, responsable de Xestión de Activos de Caixa Galicia, asegura que «o investimento en I+D+i é fonte de produtos e servizos innovadores». Entre os proxectos en desenvolvemento para os vindeiros meses inclúense o deseño dunha nova plataforma de banca internacional, unha plataforma de riscos e un proxecto de desenvolvemento de tesouraría e mercado de capitais.
Entre os produtos e servizos innovadores postos en marcha nos últimos anos por Caixa Galicia destaca o Centro On, unha oficina que se sitúa na vangarda tecnolóxica entre as entidades financeiras e que fusiona dous mundos: o virtual de Internet co físico das oficinas tradicionais.
Outro servizo innovador da caixa galega é o HAL Cash que permite o envío de diñeiro de forma inmediata a calquera teléfono móbil para que poida ser retirado ao instante e en metálico en calquera dos máis de 13.000 caixeiros adheridos á rede en España.