CaminoTool, unha nova ferramenta móbil para os peregrinos

Cada vez son máis as ferramentas tecnolóxicas que os peregrinos teñen á súa disposición á hora de encarar o Camiño de Santiago, e a empresa compostelá Dinamedia Soluciones Técnicas tamén quere contribuír a un Camiño mellor, polo que publicaron en Google Play a aplicación móbil CaminoTool (a versión para iPhone estará dispoñible proximamente) que ofrece completamente de balde para os peregrinos información sobre aloxamentos, restaurantes, alimentación, bares, farmacias, masaxistas, podólogos, dentistas, hospitais, perruqueiros, tendas de recordos, roupa...
Esta ferramenta presenta unha selección de produtos e servizos de calidade, cun amplo abano de prezos, buscando en todo momento achegar a información dun xeito áxil e facilitando a posibilidade de recoller queixas ou dar a coñecer estragos. CaminoTool permite que os seus usuarios inicien sesión no sistema para consultar os seus datos e o seu histórico de accións; fai uso da xeolocalización para indicar a posición dos establecementos que precisa o usuario; permite valorar a experiencia para que outros peregrinos poidan ter as opinións como referencia; facilita a notificación de queixas de distinto tipo (como a detección de sinais rotos ou errados, a localización de perigos...); e incluso integra un sistema de pagamentos para establecementos adheridos (nos que tamén será posible gozar de descontos como recompensa á valoración de experiencias dende a aplicación móbil).