Camo Studio permite realizar directos de calidade dende o iPad

Reincubate, os creadores de Camo, unha popular aplicación para poder empregar o móbil a xeito de cámara web engadindo moitas opcións de cara a gravacións, directos e xuntanzas en vídeo, veñen de lanzar Camo Studio para iPad, unha aplicación destinada a creadores de contido, aos que lles facilita o traballo en mobilidade, xa que funcións que até o momento só podían facer cun ordenador, agora poden facelas cun iPad dun xeito doado.
A nova aplicación permite conectar ao iPad cámaras e micrófonos, para así realizar directos de calidade, coa opción de gardar unha copia do vídeo en local; tamén acepta como entrada de vídeo capturadoras para así poder integrar videoxogos nos directos; conta con funcións de imaxe-en-imaxe, sobreimpresións web e integración de chat; e todas estas cousas poden facerse a un mesmo tempo, polo que a experiencia que se consegue sería semellante á de empregar OBS nun ordenador.
O máis sorprendente de Camo Studio para iPad é que Reincubate non ten previsto cobrar pola aplicación, de xeito que temos unha ferramenta moi completa que empregar totalmente de balde. Cómpre salientar que para funcionar precisa de iPadOS 17 e un procesador A12 ou superior, aínda que para poder retransmitir ou gravar en segundo plano é imprescindible que o procesador sexa como mínimo un M1, mentres que o resto de funcionalidades non ten tantas esixencias de hardware.
O Camo Studio tamén conta coa función de encadre automático, inclúe numerosos filtros, pode retransmitir comodamente a Twitch, YouTube e servidores que soporte RTMP, e incluso pode importar as escenas creadas na versión para PC ou Mac da aplicación.
O que si é unha novidade absoluta é o soporte de Apple Pencil, que pode aproveitarse para debuxar ou anotar sobre o contido dun xeito que resulte familiar ao espectador.
Resulta abraiante o moito que pode facer esta aplicación, e pode sorprender que non houbese nada semellante antes, nin sequera pagando, pero a resposta a iso está precisamente no feito de que a aplicación precisa de iPadOS 17 para funcionar, pois moitas das funcións da ferramenta eran imposibles en sistemas operativos anteriores por limitacións impostas por Apple.