Canon chega aos 100 millóns de cámaras dixitais compactas comercializadas

As cámaras dixitais compactas de Canon evolucionaron bastante nos últimos 12 anos

A fotografía dixital, xunto coa telefonía móbil, é unha das tecnoloxías que máis rápido se implantaron no mercado de consumo, e para ilustralo temos que Canon está a celebrar a súa cámara dixital número 100 millóns, o que é un momento histórico acadado en só 12 anos.
A primeira cámara dixital compacta de Canon fora a PowerShot 600, que se puxera á venda en 1996 e que sería o primeiro dos 106 modelos que comercializaron ata o presente mes. En todo este tempo Canon xogou un importante papel no sector da fotografía dixital con cámaras coma co lanzamento da IXUS Digital en 2000 (que podería ser a cámara que marcase o espallamento masivo da fotografía dixital), a PowerShot A70 (a cámara máis vendida en 2003), a Digital IXUS i (que foi considerada como unha cámara para o público feminino), a PowerShot G7 (que en 2007 achegou unha resolución de 10 Mpíxeles a unha cámara compacta) ou a PowerShot S5 IS (que incorporou un zoom de 12x).