Comeza en Sevilla a segunda edición do Evento Blog España

Hoxe arrinca en Sevilla unha nova edición do Evento Blog España, un encontro que se prolongará por toda a fin de semana e que pretende servir de plataforma de diálogo e interacción no mundo físico dos partícipes máis activos da blogosfera estatal, que destaca este ano polo incremento de asistentes, que pasa dos 320 de 2006 ós 866 que se agardan para a presente convocatoria.
O programa do evento pretende atender a unha temática moi ampla e completa, así como a achegar un atractivo especial grazas á participación de persoeiros do sector audiovisual, deste xeito, se mesturan intervencións sobre videoblogs, podcast, Second Life ou Twitter con mesas redondas e conferencias sobre vídeo e televisión en liña (con Hernán Casciari, Juan Ruíz Gauna e Javier Alonso), blogs e xente coñecida (con Javier Capitán, Juanma Ortega e Gisela Pulido) e mesmo unha charla estelar de Andreu Buenafuente.