Comeza en Vigo unha conferencia internacional para afondar en tecnoloxías que fortalezan a resistencia dos nosos peixes

O Centro Cultural Novacaixagalicia de Vigo acolle esta semana (de hoxe ao 28 de xuño) a primeira conferencia internacional sobre tecnoloxías e metodoloxías para a mellora da resistencia de diferentes especies mariñas de gran relevancia para o noso medio ambiente e tamén para a nosa actividade económica futura. Falamos de moluscos, peixes e crustáceos, que durante este encontro estarán no punto de mira de 350 investigadores do sector da inmunoloxía procedentes de tódolos recantos do Estado español e doutras partes do mundo. A xuntanza, que vén da man do Centro Superior de Investigacións Científicos (CSIC), diríxese igualmente a afondar na procura de compostos con aplicacións biotecnolóxicas.
Un dos alicerces ou orixes desta conferencia data de 2008, cando os investigadores do Consello Superior de Investigacións Científicas (CSIC) acharon no mexillón unha nova clase de péptidos antimicrobianos, a myticina C, e comezaron a comprender o sistema inmune destes bivalvos e a estar máis preto de desenvolver tratamentos preventivos. Cómpre lembrar que estes moluscos, coma o resto de invertebrados, non son quen de desenvolver unha inmunidade adquirida. Ademais, ao ser organismos filtradores, poden chegar a amorear unha gran cantidade de bacterias e virus. Para avaliar diferentes sistemas e tecnoloxías que garantan a súa supervivencia, reuniranse estes días en Vigo preto de 350 investigadores de todo o mundo, que amosarán os últimos avances en investigación do sistema de defensa de moluscos, peixes e crustáceos. A I Conferencia Internacional en Inmunoloxía de Peixes e Moluscos conta coa colaboración da Sociedade Internacional de Inmunoloxía destas especies e foi inaugurada este martes cun acto que contou coa asistencia do presidente do CSIC, Emilio Lora-Tamayo, o vicepresidente de Investigación Científica e Técnica do CSIC, Antonio Figueras, a director da área de Financiamento da Axencia Galega de Innovación da Xunta de Galicia, Benito Fernández, o presidente da Sociedade Internacional de Inmunoloxía de Peixes e Moluscos, Guiseppe Scapigliati, e o segundo tenente de alcalde e concelleiro da área de Seguridade, Mobilidade e Xestión Municipal do Concello de Vigo, Carlos López.
Sinalar que esta conferencia internacional será tamén unha oportunidade para que os investigadores que levan a cabo traballos de xenómica con estes animais profunden no seu comportamento, variación individual e resposta ante o cambio global. Científicos como os estadounidenses John Liu Zhanjiang, da Universidade de Auburn, e Steven B. Roberts, da Universidade de Washington, ou o británico Simon MacKenzie, da Universidade de Stirling, achegarán algunhas das claves destes mecanismos con aplicacións potenciais en medicamento, alimentación e cosmética.