DVD Jon publica unha aplicación que permite copiar música de iTunes

O popular Jon Lech Johansen (máis coñecido coma DVD Jon) vén de lanzar dende a súa empresa DoubleTwist unha aplicación informática que permite intercambiar contidos multimedia entre distintos dispositivos de xeito que mesmo os temas adquiridos a través da Internet (e protexidos con sistemas DRM) se poden copiar a reprodutores de distintas marcas.
O DoubleTwist Desktop permite que as cancións xestionadas dende iTunes se poidan copiar a reprodutores multimedia e consolas de videoxogos portátiles alleos a Apple. A aplicación é compatible coa PSP, os móbiles da N-series de Nokia, os dispositivos Walkman e Cybershot de Sony Ericsson e os teléfonos intelixentes co sistema operativo Windows Mobile.
O software permite a conversión de ficheiros a un formato compatible co dispositivo de destino, dando máis liberdade ós usuarios e evitando os restrictivos controis de copia dalgúns formatos de ficheiros multimedia.