El Corte Inglés comeza a vender o seu propio lector de e-books

Os dispositivos de lectura de libros electrónicos poderían popularizarse en España este ano, e coma signo diso temos que El Corte Inglés vén de incorporar ao seu catálogo de produto o Inves-Book 600, ou sexa, un trebello de fabricación propia (da filial Inves) que segundo comentan sería o lector máis básico da taiwanés Netronix, polo que parece que están a probar a resposta do mercado, para decidir se no futuro achegan dispositivos con pantalla táctil e conectividade sen fíos, que son os que teñen un futuro máis decidido, pero que polo momento resultan algo caros.
O Inves-Book 600 utiliza tecnoloxía E Ink, goza dunha pantalla de 6 polgadas cunha resolución de 600 x 800 píxeles, amosa 8 niveis de gris, ten unha batería que permitiría a lectura de 8.000 páxinas, conta cunha memoria interna de 512 Mb ampliable mediante tarxetas SD de ata 4 Gb, soporta ficheiros TXT, FB2, HTML, PRC, PDF, EPUB, JPEG e MP3, mide 118 x 188 x 8,5 milímetros e pesa 174 gramos. Véndese a 299 euros e inclúe cable USB, cargador, auriculares estéreo e 120 libros clásicos e contidos de actualidade de distintas editoriais (Cambridge, Harlequin Ibérica, Vitruvio, Edaf, Verbo Divido, Equipo Sirius, Ecir Editorial, OCV, E-Liatterae, Ediciones STJ , Nowtilus, D.Ediciones, Plaza y Valdés, Marcombo, Pierre, INAP, Miniterio Economía y Hacienda, Visión, Graó, Nostrum, Dykinson, Linkgua e Paréntesis Editorial).