El Ministerio del Tiempo presentará a súa nova experiencia de realidade virtual en Mundos Digitales

O congreso internacional de animación efectos especiais de vídeo, realidade virtual, videoxogos e arquitectura dixital Mundos Digitales, que celebrarase na Coruña entre os días 6 e 8 de xullo, contará con interesantes contidos para os seareiros da serie de RTVE El Ministerio del Tiempo, xa que un dos seus relatorios correrá a cargo dos responsables de Future Lighthouse, o estudio español que presentará en primicia a segunda experiencia en realidade virtual inmersiva para esta ficción televisiva.
Javier Lajara (Future Lighthouse) amosará os eixes do novo proxecto de realidade virtual que percorrerá varios dos lugares máis recoñecibles do Ministerio, permitindo que o usuario camiñe e interactúe con obxectos e personaxes da seria. Lajara dará conta do proxecto de captura e a adaptación dos contornos reais da serie para o seu uso nun motor 3D en tempo real (Unity).
El Ministerio del Tiempo non é a única ficción española que terá presenza en Mundos Digitales, xa que tamén contarán coa presenza de Ignacio Lacosta, de Entropy Studio, empresa responsable dos efectos de series como Velvet ou Las Chicas del Cable; Lacosta compartirá panel con Félix Bergés de El Ranchito (responsable dos efectos visuais de Lo Imposible e Un monstruo viene a verme) e Xavi Tribó de Glassworks.
No marco de Mundos Digitales tamén presentarase a versión renovada da Familia Telerín, agora en 3D da man do creador de Pocoyó, e o novo filme Tadeo Jones 2: El Secreto del Rey Midas (que chegará aos cines o 25 de agosto) servirá de imaxe do congreso que dende a cidade da Coruña abre unha fiestra a todo un sector empresarial que está a vivir un dos seus mellores momentos a nivel técnico e creativo.