En marcha unha nova publicación de balde sobre videoxogos: Fase Extra Magazine
xoves, 5 de setembro do 2013
Esta semana púxose a
disposición dos seareiros dos videoxogos unha nova publicación de
balde, interactiva e desenvolvida para iPad. Trátase de Fase
Extra Magazine, unha revista sobre lecer tecnolóxico que bota
man de Tablet Planet,
solución para a achega de contidos hipermedia desenvolvida pola
firma española RDL Tech. O lanzamento do primeiro número acompáñase
de portadas animadas, videoentrevistas, audiovisuais, sons e outros
recursos de interactividade. Segundo informan os responsábeis da
revista, esta salienta por fornecer unha ollada moita máis próxima
á industria dos videoxogos, ademais de por achegar unha información
global de produtos comerciais e tamén de produtos independentes e
alternativos da industria española.
A publicación, xa
dispoñíbel na App Store, subminístrase por números en
descarga individual ou ben a través de subscrición de balde. A
editora de Fase Extra Magazine é 1bs Group, empresa de
comunicación asturiana especializada no sector audiovisual e
multimedia, posta en marcha no ano 2000 por Ángela Herrero Arnaldo.