Esta semana celebrarase Mundos Digitales na Coruña

martes, 4 de xullo do 2023 Marcus Fernández

Tras máis de dúas décadas de actividade o Congreso Internacional de Animación, Efectos Visuais e Novos Media Mundos Digitales volve á cidade da Coruña, abrindo as súas portas o vindeiro xoves dando pé a un programa de actividades cheo de interesantes propostas nas que destacan os efectos visuais, o traballo en rede e a intelixencia artificial.
Aínda que estamos ante unha cita orientada a profesionais, moitos dos seus contidos tamén teñen un grande atractivo para os afeccionados, xa que están presente responsables de producións audiovisuais como Avatar, Pinocho (de Guillermo del Toro), The Sea Beast, Super Mario Bros. e Arcane, na liña de anteriores ediicóns de Mundos Digitales, aínda que desta volta destacan un par de temáticas moi acaídas pola súa actualidade, como son os contidos relativos á intelixencia artificial e, moi especialmente, ás rodaxes virtuais, xa que en breve a Cidade das TIC vai contar cun plató virtual avanzado, polo que afondar nesta tecnoloxía é moi oportuno.
Mundos Digitales tamén contará coa súa grande Feira de Emprego, na que compañías de toda Europa (e incluso unha de Australia) acoden na procura de profesionais que encaixen nos numerosos perfís que demanda o sector.
Este evento desenvólvese principalmente no PALEXCO, pero de cara ao público xeral tamén haberá sesións na sede de Afundación, como será unha conferencia sobre o youtubeiro divulgador sobre IA Carlos Santana (Dot CSV) e un relatorio de Alba Meijide, comisaria da exposición AI: More the Human.
Da man da Deputación da Coruña tamén se celebrará un obradoiro e un concurso de deseño de personaxes para animación e videoxogos que desenvolverá Marcos Raya, artista multidisciplinar que ten traballado para PlayStation, Xbox, Nintendo, Nickelodeon ou Disney.

PUBLICIDADE