FACUA arremete contra a nova suba de prezos de Movistar Fusión

A suba de 5 euros no prezo de Movistar Fusión do ano pasado, rexeitada pola Xunta Arbitral de Consumo de Galicia, que FACUA leva aos tribunais a través dunha demanda colectiva, non vai quedar aí, senón que a entidade de defensa dos consumidores vai ampliar a demanda para incluír tamén a suba de 3 euros/mes que se aplicará o mes que vén.
Estamos a falar dunha suba de prezos que en pouco máis dun ano sumaría 8 euros/mes cando na publicidade e información comercial de Movistar Fusión falábase de prezos “para sempre”, o que é unha promesa con valor contractual que a compañía debería respectar e non chegaría con permitir a cancelación do contrato unilateralmente sen penalización.
FACUA considera que a conduta de Movistar é desleal e quere paralizar a nova suba de prezos, á vez que pretende obrigar a Movistar a devolver os cartos cobrados de máis aos máis de 4.000 usuarios que se sumaron á demanda colectiva.