Fademga Feaps Galicia recibe 14 ordenadores da Fundación Bip Bip

Pensando na influencia que teñen as novas tecnoloxías á hora de facilitar a integración das persoas con discapacidade dentro da sociedade actual e co fin principal de permitirlles ás mesmas socializarse e intercomunicarse entre elas a través de Internet, a Fundación Bip Bip vén de facer entrega de 10 ordenadores a Fademga Feaps Galicia, beneficiando, con esta iniciativa, a 6 grupos de persoas con discapacidade intelectual autoxestoras.
Esta dotación de equipamento tecnolóxico complétase, asemade, coa concesión de outros 4 ordenadores ás oficinas do Servizo Público de Emprego que Fademga posúe nas catro provincias galegas.
Ámbalas dúas entidades asinaron un acordo previo á doazón no que se recollía o compromiso de desenvolver de xeito conxunto a redución progresiva da fenda dixital existente nos sectores máis desfavorecidos da sociedade. O obxectivo deste convenio é, segundo apuntaron os seus precursores, “manter e potenciar a autonomía persoal de cada usuario, así como axudarlle a comprender e aceptar a súa realidade persoal”.
Con este material informático, os dous colaboradores buscan que os beneficiarios do mesmo se introduzan ou afonden máis, segundo o seu nivel de coñecemento previo, na alfabetización dixital, no emprego de Internet e na ofimática, de xeito que todos estes coñecementos adquiridos os poidan aplicar na súa vida laboral e na súa formación.

Beneficiarios

Os beneficiarios desta axuda son 6 dos 11 grupos de autoxestores existentes nas asociacións federadas en Fademga. Estes grupos son os pertencentes ás asociacións de: Apace, Apader, Juan XXIII, Nosa Señora de Chamorro, AMIPA e Prodeme.
Os equipos informáticos era unha demanda constante dos grupos de autoxestores das entidades incluídas en Fademga xa que, deste xeito, disporían de tódalas ferramentas necesarias para ter unha relación fluída e directa entre todos eles.