Galvintec optimiza a xestión de almacéns coa súa solución Moodular IA

A galega Galvintec, firma TIC do Grupo Alvariño, presentou este xoves 22 de xaneiro na Cidade dás TIC os avances de Moodular IA, un motor de intelixencia artificial para a loxística que permite optimizar a xestión de almacéns e centros de distribución. Está baseado en optimización matemática e é capaz de simular o funcionamento dun almacén completo mediante xemelgos dixitais e calcular roteiros de traballo máis eficientes para o picking.
As funcionalidades deste desenvolvemento déronse a coñecer no marco da xornada Proxectos IA 360. Desenvolvemento tecnolóxico e innovación con IA, organizada polo Clúster TIC Galicia para presentar os proxectos que as empresas asociadas levaron á convocatoria IA360, axudas para o desenvolvemento tecnolóxico e a innovación mediante ou uso da Intelixencia Artificial (IG408M) convocadas polo IGAPE no marco do Plan de Recuperación, Transformación e Resiliencia, financiado pola Unión Europea-NextGenerationEU.
Moodular IA é un motor de intelixencia artificial para planificación loxística baseado en optimización matemática, non en IA xenerativa. Desenvolveuse grazas ao apoio da liña de axudas do IGAPE e, segundo informou Galvintec, “demostrou en contornas simuladas reducións significativas nas distancias percorridas polo persoal operario da almacén, redundando nunha mellora da produtividade e menor fatiga operativa, así como nunha menor cantidade de erros no picking, o que contribúe tamén a mellorar a experiencia do cliente”.
Moodular IA intégrase en Moodular, a plataforma na nube desenvolvida por Galvintec que dá resposta á xestión de todos os procesos que implica a venda online, desde inventarios e almacéns, á sincronización cos principais mercados en liña e a integración coa loxística.
Galvitec explica que a nova ferramenta ten “un funcionamento simple” no que o usuario dá a orde de planificación en linguaxe natural, un LLM (Large Language Model) traduce a petición a datos, Moodular IA calcula a mellor solución, e o LLM presenta a resposta ao usuario.
“Moodular IA vén así a dar resposta ás necesidades de empresas con almacéns que necesitan reducir os seus custos loxísticos, a contornas onde conviven persoas e máquinas (escenarios home-robot) e empresas que buscan planificación automatizada”, explicou Moisés Mateo, responsable de negocio de Galvintec, engadindo que “o proxecto busca integrar algoritmos avanzados na plataforma Moodular para reducir a distancia total percorrida polos operarios durante o picking, minimizar os tempos de preparación de pedidos, incrementar a satisfacción do cliente e optimizar os roteiros de picking”, detallou.
E engadiu máis polo miúdo: “A IA confúndese cunha variña máxica, pero en operacións reais, como en almacéns, centros de distribución ou ecommerce, as ferramentas de IA máis populares non funcionan. Os modelos de linguaxe como ChatGPT funcionan extraordinariamente ben en tarefas de linguaxe, pero a súa natureza é probabilística: xeran a resposta que parece máis axeitada segundo o contexto. Iso é unha vantaxe enorme para comunicar, pero unha limitación seria para planificar. Planificar un almacén implica asignar pedidos, persoas, percorridos, tempos, prioridades e restricións físicas, que multiplican as posibilidades. En termos técnicos, o número de combinacións medra de forma exponencial. En termos prácticos, significa que non abonda cunha resposta razoable, que soe ben, senón que fai falta o mellor. Aquí é onde moito sistemas fallan. Non porque non sexan intelixentes, senón porque non están deseñados para optimizar, e así chegamos á conclusión lóxica: non toda a intelixencia artificial fai o mesmo. A resposta é o desenvolvemento de motores de planificación loxística baseados en optimización matemática, capaces de simular o funcionamento dun almacén completo mediante xemelgos dixitais e calcular roteiros de traballo máis eficientes, como Moodular IA”, expuxo.