Gmail e Google Calendar renovan as súas aplicacións para iOS

As aplicacións de Gmail e Google Calendar veñen de actualizarse en iOS incorporando atractivas novidades. De feito, considérase que no caso de Gmail estamos ante a meirande actualización da aplicación para dispositivos móbiles de Apple en preto de 4 anos, cunha nova aparencia, mellores transicións e algunhas características moi demandadas polos usuarios. Por exemplo, a aplicación permite agora, ao igual que tamén se pode facer dende a web, desfacer o envío dunha mensaxe (evitando así envíos accidentais), as buscas axilízanse mediante resultados instantáneos e suxestións de escritura (evitando erratas) e facilitan o uso de xestos para arquivar e borrar mensaxes (facilitando así o manter a bandexa de entrada máis limpa).
O Calendario de Google, pola súa banda, estrea funcións como amosar vistas de mes e de semana en modo apaisado, integración da busca de Spotlight (facilitando así atopar elementos introducidos na aplicación) e alternancia de calendarios (de xeito que usuarios que teñan que comprobar con frecuencia calendarios non gregorianos poden engadilos para poder consultalos dende o calendario actual).