Google Chrome chegará a Linux e Mac OS X en breve

Para mellorar o funcionamento das súas páxinas web dende Google estrearon un navegador baseado en WebKit que polo momento só está dispoñible para Windows, mentres que as súas versión para Mac OS X e Linux se fan de rogar, aínda que dende a compañía aseguraron que agardan que cheguen durante a primeira metade do ano á vez que anuncian que a versión actual actualizarase para soportar extensións (para poder roubar cota de mercado ao Mozilla Firefox) no que sería un Chrome 2.0 que polo momento está en probas.
A nova versión de Chrome (2.0.156.1) non só engadiría extensións (que entre outras cousas permitirían a personalización do navegador a través de scripts Greasemonkey), senón que tamén incorporaría auto-completado de formularios, zoom a páxina completa (ao ampliar unha páxina a versión actual só amplía o texto), desprazamento automático, importación de marcadores dende Google Bookmarks, nova implementación da función de SafeBrowsing, etc.
As melloras anunciadas parecen moi interesantes, e dan a entender que a guerra dos navegadores web non fixo máis que comezar.