Google Maps para Android agora pode funcionar sen conexión á Internet

As aplicacións de navegación GPS no móbil feriron de morte os navegadores dedicados, pero hai moitas situacións nas que non resultan moi prácticos xa que boa parte destas ferramentas precisan de conexións constante á Rede para funcionar, o que pode ser un problema tanto por non ter contratado un servizo de datos no móbil como por estar en zonas con mala cobertura, de aí que dende Google decidan finalmente reaccionar e anuncian que a partires de hoxe os usuarios da súa aplicación de mapas poden descargar áreas completas no seu terminal para telos accesibles cando non teñan conexión á Internet, continuando a funcionar a navegación sen conectividade (ata o momento, se tiñamos os mapas no móbil podiamos consultalos fóra de liña, pero a navegación desactivábase).
Para descargar un área chega con buscar, por exemplo, unha cidade, para logo premer a opción de Descargar. Unha vez descargada Google Maps pasará ao modo offline de xeito automático cando a Rede falle e esteamos a empregar ese mapa, volvendo ao modo en liña cando se retome a conexión. A descarga pode facerse mediante redes Wi-Fi, de xeito que agora os usuarios que non teñan conexión de datos no móbil tamén poderán gozar de funcionalidades de navegación GPS básicas.
Aínda que esta nova funcionalidade só está dispoñible para a aplicación de Google Maps para Android, nas vindeiras semanas atoparase tamén dispoñible na aplicación para iOS.