Gradiant celebrou 15 anos de andaina facendo balance de fitos

Gradiant, o centro galego privado de tecnoloxía TIC, está este mes de aniversario: cumpre 15 anos de andaina. Así, desde a súa posta en marcha no ano 2008, o centro tecnolóxico atraeu a Galicia máis de 85 millóns de euros dos que 10,7 millóns pertencen a programas europeos de innovación como H2020 ou Horizonte Europa, entre outros.
Os seus responsábeis salientaron tamén os 12,7 millóns de euros doutras entidades galegas que Gradiant conseguiu sumar, mentres que máis de 27 millóns foron captados directamente de empresas. Desde os seus comezos, ingresou máis de 75 millóns de euros, dos que o 10% proveñen de licenzas de tecnoloxía desenvolvidas para empresas.
Luís Pérez Freire, director xeral de Radiante, sinalou a respecto deste balance: “Síntome moi orgulloso de que o centro chegue aos seus 15 anos de vida como unha entidade de referencia na I+D+i e situado entre os tres centros TIC máis importantes de España, algo que se reflicte nos resultados de 2022, un ano de récord no que obtivemos uns ingresos de 8,6 millóns de euros, un 45% máis que en 2021” e concluíu que “chegar até aquí non sería posíbel sen o noso equipo -un persoal consolidado e integrado por 177 persoas traballadoras que son o aceno da nosa proxección e crecemento- e aos máis de 400 clientes que confiaron en nós”.
Alén disto, Gradiant formou a máis de 300 profesionais TIC que seguen traballando na organización ou se incorporaron a outras empresas do sector tecnolóxico. O equipo humano de Gradiant está integrado por 177 traballadores e traballadoras cunha antigüidade de máis de 4 anos e unha rotación do 13%.
O centro foi provedor de innovación para máis de 400 clientes diferentes, desenvolvendo un total de 727 proxectos de orientación industrial, dos que o 45% son de ámbito nacional: 42% galegos e 13% internacionais. O 70% dos clientes do centro son pequenas e medianas empresas (pemes) mentres que o 90% dos proxectos tecnolóxicos concibidos e desenvolvidos son empregados polas empresas. Compañías e administracións públicas de Alemaña, Brasil, Colombia, México ou Vietnam, entre outros, tamén optaron por eles.
Gradiant traballa man a man coa industria da súa contorna achegando a súa experiencia e, centrándose no desenvolvemento de seis tecnoloxías como punta de lanza: ciberseguridade, Intelixencia Artificial, comunicacións avanzadas, tecnoloxías cuánticas, drons e industria intelixente.
A xeito de resumo, sinalar algúns dos proxectos máis senlleiros nos que o centro Gradiant estivo implicado:
- Creación do primeiro laboratorio cuántico de Galicia (2023).
- O centro conta coa súa propia tecnoloxía (láseres de creación propia e electrónica para a xestión de tecnoloxías atómicas).
- O primeiro proxecto que o laboratorio ten entre mans é profundar no desenvolvemento dunha antena ultrasensíbel que sexa capaz de traballar todos os anchos de banda.
- Apertura do Consello Empresarial (integrado por 22 entidades).
- Integración en Sistema Cervus (orientado a misións militares).
- Posta en marcha do laboratorio 5G (2021).
- Gradiant é aliado estratéxico na transformación dixital da industria galega (exemplos: Facendo4.0 e Sea2Table).
- CUAS Navantia (Sistema antidron desenvolvido para Navantia).
- Redes de Excelencia Cervera.
- Creación da primeira spin-off de Gradiant (Alice Biometrics).
- TEGRA Cybersecurity Center (2018, centro de ciberseguridade de Galicia, co apoio de Telefónica).
- Gradiant Signer (tecnoloxía de Verificación de Firma Dinámica, DSV).
- Telefónica adquire Shadow (solución de seguridade e trazabilidade documental de Gradiant).
- LiftGate (Litfting Up the Research Potential of the Galician Telecomms Centre).
- Gradiant obtén selo de excelencia do Ministerio de Economía.
- Proxecto SCAPE, Software de vixilancia do AVE á Meca.
- Entrega de paquetes con drons 5G (en colaboración con Telefónica e Correos).