Gradiant fai reconto da súa frutífera actividade na iniciativa europea LIFTGATE

O proxecto LIFTGATE (Lifting Up the Research Potential of the Galician Telecomms Center) é unha iniciativa dirixida a pór o noso potencial investigador, no eido das novas tecnoloxías da información e das telecomunicacións, o máis preto posible de Europa. Máis en concreto, este proxecto financiado pola Comisión Europea a través do VII Programa Marco (o Programa de Capacidades-RegPot), encamíñase a aumentar a competitividade do centro Gradiant como centro tecnolóxico a nivel europeo. A este respecto, trátase dunha iniciativa viva que cada pouco estreita ligazóns entre Gradiant e o tecido innovador internacional. De feito, a sede do centro galego foi o escenario recente da segunda xuntanza do comité consultivo de LIFTGATE.
O obxectivo foi revisar a intensa actividade que Gradiant mantivo dentro de LIFTGATE durante os dous primeiros anos de actividade, os resultados que se obtiveron e as previsións para o terceiro ano do proxecto, que comeza agora. A reunión pechouse cunha mesa redonda na que os membros do comité debateron ideas que servirán para facer aínda máis intenso o impacto de LIFTGATE en Gradiant e no ecosistema de innovación galego.
Por certo que o comité está presidido polo director xeral de Gradiant, Fernando Pérez González, e conta con representantes dos tres ámbitos implicados na innovación: a industria, a Administración a través da Axencia Galega de Innovación, e as tres Universidades galegas. Ademais, no devandito equipo tamén hai dous representantes de Technicolor e Telecom Bretagne, dúas das entidades francesas coas que Gradiant mantivo intercambios de persoal investigador durante o proxecto.
A función do comité consultivo é avaliar a orientación do proxecto, a súa execución e os resultados obtidos. Segundo informa o centro galego, LIFTGATE seguirá a xerar actividade na súa sede en Vigo. De feito, a vindeira semana celebrarase alí unha xornada formativa titulada Mercadotecnia e comercialización de propiedade intelectual e tecnoloxía. Será o venres 18 de outubro, e estará orientada ao persoal interno do centro.