Grande éxito da Xbox 360 nos EE.UU. no mes de xuño

Vendas das distintas plataformas de xogo nos EE.UU. durante o mes de xuño

En España Nintendo arrasa en vendas de videoxogos, e entre as consolas de alta definición Sony trunfa, polo que temos que recoñecer que estamos nun mercado distorsionado, no que a marca PlayStation ten moita sona, polo que aquí sorprende ver cómo a impresión global é que Sony está a perder o rumbo. Para ter unha mellor perspectiva podemos ver as vendas de videoxogos en EE.UU. durante o mes de xuño, na que a Xbox 360 ocupa os dous primeiros postos con Prototype e UFC 2009: Undisputed, mentres que en España non é capaz de colocar ningún título entre os 10 primeiros postos. De feito, entre os 10 xogos máis vendidos a Xbox 360 triplica as vendas da PS3 e case suma tanto como a Wii e a PS3 xuntas.
Entendemos así que a consola de Microsoft está gozando dunha saúde magnífica, mentres que a PS3 está a telo moi difícil nesta xeración de consolas, pois aínda que a distancia entre a PS3 e a Xbox 360 a nivel global é cada vez menor, a consola de Microsoft segue a vender máis unidades, colocando 240,6 milleiros de unidades en xuño, mentres que a PS3 quedou en 164,7 milleiros e a Wii continúa vendendo moitísimo (361,7), o que non parece traducirse nunhas vendas de xogos moi fortes.
Con estes datos na man podemos asegurar que a Xbox 360 en Norteamérica é a consola que está a funcionar mellor, pois non só ten unhas boas vendas (mellores incluso que o ano pasado) e un bo prezo, senón que tamén sería a que vende máis xogos por consola e resulta así máis rendible para os desenvolvedores.
Pero esas non serían as únicas malas novas para Sony, senón que no mercado portátil o seu resultado estaría a ser desastroso, con só 163,5 milleiros de PSP vendidas nos EE.UU. mentres que a Nintendo DS chega aos 766,5 milleiros, ou sexa, que Nintendo case quintuplica en vendas á portátil de Sony, e a cousa non parece que vaia a cambiar a medio prazo, pois a PSPGo será unha consola demasiado cara para a conxuntura económica actual (mentres a Nintendo DSi está a venderse moi ben) e a PS3 continúa a ter un prezo desorbitado. Non sorprende así que os analistas aseguren que Sony ten que reducir o prezo da PlayStation 3 no outono se non quere enfrontarse a unha campaña de Nadal que non será capaz de cambiar o rumbo descendente da empresa nipona.